YokoMama我和我的兒子: 2019關西自駕：大阪Soraniwa SPA空庭溫泉

2019關西自駕親子遊大阪篇Soraniwa SPA空庭溫泉

喺大阪嘅「Soraniwa SPA空庭溫泉」，2019年2月先開幕，而且佢嘅位置非常方便，就喺弁天町站行一至兩分鐘就到。如果好似我哋咁住喺大阪海灣塔藝術酒店 (ART HOTEL Osaka Bay Tower)，仲可以由二樓直接行過去，一分鐘搞掂！

其實成個空庭溫泉設計概念同東京嘅大江戶溫泉物語一樣，都係一個一站式溫泉樂園，入去有得著浴衣、有得食、有得浸溫泉、有得影靚相嘅地方。如果你去過大江戶，相比之下，空庭嘅面積係細過大江戶好多，溫泉嘅數量亦都係少過大江戶，以我目測大概有六至七個池，其中有啲特色嘅silk池、紅酒般嘅日常池，但其他就冇乜特別，除咗有一個池就係可以望住戶外嘅地方，畀你一邊浸一邊睇下人哋喺戶外庭園中行嚟行去影相。

至於另一失色嘅地方，就係呢度完全冇嗰啲傳統日本遊戲小攤位，餐廳方面亦都得四、五間（有啲仲要只係飲酒嘅），但係

餐廳

佢就有一個額外付費嘅岩盤浴區，我喺網上望過啲房都幾靚，又有特色，但問題係呢個區小朋友唔入得㗎，你帶住小朋友，就唔可以去玩了，當然你又可以比錢去家庭浴室來個私人家族風呂，但係7000Yen兩小時又貴貴地咁囉。

另一個麻煩就係呢度夜晚七點之後係唔畀小朋友入，所以如果要同小朋友去玩，就要揀啱時間啦。

玩之步驟

為免做錯嘢尷尬，所以容許YokoMama簡單介紹下玩法（畀第一次去玩嘅你，我都係從錯誤中學習）

Step 1：入到去已有兩位著和服嘅reception小姐，行入去地蓆前，麻煩先除鞋！跟住拎住對鞋入去揀鞋櫃，鎖好。我小朋友8歲佢地就話要自己用一個鞋櫃啦。

Step 2：之後攞住條鎖匙去reception嗰度，佢會問你幾多個人，再畀幾多條鎖匙你，其中喺館內嘅消費帳單一般會入晒去男士條匙度。你係要show個鞋櫃匙畀佢睇，因為我本來貪方便將阿仔條匙放在我個鞋櫃中，但原來唔得嘅。

Step 3：之後就去揀浴衣。男仔小朋友係冇得揀第一款藍色，女仔都無得揀，不過佢哋嘅腰帶有兩款顏色（粉紅同黃）。當然女士浴衣係多啲花款，之但係我又想講呢度嘅浴衣有一處特別，就係佢唔係傳統左疊右嘅一條衫，而係入面先來一條背心裙，出面先披一件浴衣嘅左疊右物體！

Step 4：男女各自去右邊嘅更衣室換衫之後，出嚟會合返家人。提一提，呢件浴衣之內你係最好要著內衣褲，同埋你所有梳洗用品都唔好鎖喺呢個moment嘅更衣室locker之內。你鎖嘅只係你本來身穿嘅衣服就得。而更衣室門口會有大量黑色環保袋畀你用來放私人用品拎住周圍去。

天燈走廊

Step 5：更衣室出嚟咗手邊就係岩盤浴入口同付款處。唔去嘅話，去右邊轉返出去，經過一個靚靚天燈區影相位，就係餐廳、購物區同埋影相嘅地方。

左邊係餐廳

Step 6：呢度任你影，任你食（梗係自費啦），仲有專人免費同大家影合照，

佢會畀道具你，仲會教你擺pose，一個組合（家庭，女女，男女，男男男都係組合計）免費送一張好細嘅postcard（含一張相），當然你要其他相就要買，記得好似係1500Yen，可以用QR code 24小時內download。記住，呢個QR Code卡好重要，一陣去戶外會有用，keep住喺身先。

大會攝影

Step 7：行到去去入面盡頭，有電梯上五樓，就會去到另一個更衣室，如果你要去浸溫泉，入去換完曬衫就可以接去浸（咁呢個locker當然係可以放晒你所有物品），但係你要去戶外影相的話，就唔駛用locker，直接行去戶外區出口，喺庭園相會你嘅家人啦！出口處仲有拖鞋同遮，拖鞋一定要著㗎，記得攞條小毛巾出去浸完腳抹（你仲有個黑色環保袋跟身㗎嘛，放喺裏面囉），而木拖鞋仲有小朋友size，當然好重，行路會困難一啲。