本地新酒店： ALVA HOTEL BY ROYAL帝逸酒店

熱愛住酒店的我們這一家今次試住了剛剛在石門新開的帝逸酒店（ALVA HOTEL BY ROYAL），與帝京、帝景等是同一集團，然而這裏並不是主打親子路線，而是走型格路線，但趁新簇一試，一試難忘，令我哋即晚想加訂添！

PitStop

或者仍然是新開幕的關係，平日房價非常划算，以星期五晚計，一晚才4XX多元，住高一級（河景）也只是5XX元。雖然一般的房間不算很大，但感覺不焗促，可能窗夠大。這裏除了新，最大的特色係設計非常新潮，由大堂的設計已可看到，好in，好green（有一片綠色仿草牆），員工超級友善。Check in兩旁一邊是輕食咖啡廳PitStop，推出的下午茶set又靚，環境亦一流；一邊是供隨意享用的共享空間，後面便是自助餐廳Alva House，聞說常常滿席。

值得一提的是這裏還有中菜廳，還有我重點推介二十八樓日式餐廳源峰，除了有日籍大廚坐陣，這裏以落地玻璃作採光，景觀一流，加上有私人房（設電視）、戶外座位，一個字，好寫意！！當然你問貴唔貴，唔貴係呃你，中上價啦，食個景嘛！自己睇睇餐牌衡量吓。

源峰

講返入住重點，作為一晚住客，當然係留意房間同酒店設備。講房。新奇嘅玩意沿於一個iPad，原來房內的燈、電視頻道以

及冷氣都在iPad中調校，好新鮮，而且不得了，電視頻道比一般酒店多，開住NHK我仲以為自己去咗日本。

房內有illy咖啡機，附兩包咖啡試飲，雪櫃幾罐汽水都係送嘅，枱上有杏仁餅同山渣餅亦係免費，比較驚喜。USB插頭充足，拖鞋唔係薄紙款，浴袍仲要係內層面料係軟軟棉質，好舒服嘅毛公仔咁樣！

講浴室，用品正常，都係有牙刷、梳、化妝棉等等，點知另一個驚喜位又出現，就係牙刷係...木做嘅！點解嘅點解嘅？我真係第一次見，好想拎返屋企收藏。雖然沒有浴缸，但呢度坐廁同淋浴間係各據一「室」，淋浴有天花大花灑，手提花灑都好正，因為係最新式唔會打啲水落身時好痛，係非常溫柔，我個仔好滿意。我仲發現有日用同夜用...洗頭水／沐浴露，到底係咩意思？應該係味道唔同，比你energy或relax。依酒店資料顯示，「為確保優質的睡眠質素，酒店選用脊醫認可的Sealy床褥及高級寢具用品，配合睡枕選單供選擇。浴室另設有「優質水療淋浴系統」，能釋出含維他命C和膠原蛋白的軟水，有助改善膚質及髮絲。」嘩，真係咁勁？

其他設施仲有令人開心嘅頂層露天恆溫泳池，攝氏28度令我地1月都即刻買返件泳衣落水，吸引程度可想而知，仲有救生員當值添。而入面健身房有一個玩VR兼考平衡嘅器材，不過我地就冇時間試了。總之今之入住評價係高嘅，一定會再去一試！

露天花園